ΠΡΑΞΕΙΣ ΤΩΝ ΑΠΟΣΤΟΛΩΝ 16:4-15

SBL Greek New Testament

⁴ ὡς δὲ διεπορεύοντο τὰς πόλεις, ^[a]παρεδίδοσαν αὐτοῖς φυλάσσειν τὰ δόγματα τὰ κεκριμένα ὑπὸ τῶν ἀποστόλων ^[b]καὶ πρεσβυτέρων τῶν ἐν ^[c]Ἱεροσολύμοις. ⁵ αἱ μὲν οὖν ἐκκλησίαι ἐστερεοῦντο τῇ πίστει καὶ ἐπερίσσευον τῷ ἀριθμῷ καθ’ ἡμέραν.

^6 [d]Διῆλθον δὲ τὴν Φρυγίαν ^[e]καὶ Γαλατικὴν χώραν, κωλυθέντες ὑπὸ τοῦ ἁγίου πνεύματος λαλῆσαι τὸν λόγον ἐν τῇ Ἀσίᾳ, ⁷ ἐλθόντες ^[f]δὲ κατὰ τὴν Μυσίαν ἐπείραζον ^[g]εἰς τὴν Βιθυνίαν ^[h]πορευθῆναι καὶ οὐκ εἴασεν αὐτοὺς τὸ πνεῦμα ^[i]Ἰησοῦ· ⁸ παρελθόντες δὲ τὴν Μυσίαν κατέβησαν εἰς Τρῳάδα. ⁹ καὶ ὅραμα ^[j]διὰ νυκτὸς ^[k]τῷ Παύλῳ ὤφθη, ἀνὴρ ^[l]Μακεδών τις ἦν ἑστὼς ^[m]καὶ παρακαλῶν αὐτὸν καὶ λέγων· Διαβὰς εἰς Μακεδονίαν βοήθησον ἡμῖν. ¹⁰ ὡς δὲ τὸ ὅραμα εἶδεν, εὐθέως ἐζητήσαμεν ἐξελθεῖν ^[n]εἰς Μακεδονίαν, συμβιβάζοντες ὅτι προσκέκληται ἡμᾶς ὁ ^[o]θεὸς εὐαγγελίσασθαι αὐτούς.

¹¹ Ἀναχθέντες ^[p]οὖν ^[q]ἀπὸ Τρῳάδος εὐθυδρομήσαμεν εἰς Σαμοθρᾴκην, τῇ ^[r]δὲ ἐπιούσῃ εἰς ^[s]Νέαν Πόλιν, ^12 [t]κἀκεῖθεν εἰς Φιλίππους, ἥτις ἐστὶν ^[u]πρώτη τῆς μερίδος Μακεδονίας πόλις, κολωνία. ἦμεν δὲ ἐν ^[v]ταύτῃ τῇ πόλει διατρίβοντες ἡμέρας τινάς. ¹³ τῇ τε ἡμέρᾳ τῶν σαββάτων ἐξήλθομεν ἔξω τῆς ^[w]πύλης παρὰ ποταμὸν οὗ ^[x]ἐνομίζομεν προσευχὴν εἶναι, καὶ καθίσαντες ἐλαλοῦμεν ταῖς συνελθούσαις γυναιξίν. ¹⁴ καί τις γυνὴ ὀνόματι Λυδία, πορφυρόπωλις πόλεως Θυατείρων σεβομένη τὸν θεόν, ἤκουεν, ἧς ὁ κύριος διήνοιξεν τὴν καρδίαν προσέχειν τοῖς λαλουμένοις ὑπὸ ^[y]τοῦ Παύλου. ¹⁵ ὡς δὲ ἐβαπτίσθη καὶ ὁ οἶκος αὐτῆς, παρεκάλεσεν λέγουσα· Εἰ κεκρίκατέ με πιστὴν τῷ κυρίῳ εἶναι, εἰσελθόντες εἰς τὸν οἶκόν μου ^[z]μένετε· καὶ παρεβιάσατο ἡμᾶς.